Katrina, Ginanahan Daw Kay Hayden (Anong Pakiramdam Mo Dra. Belo?)

KAHIT ibinasura ang kaniyang kaso laban kay Hayden Kho Jr., nobyo ni Dra. Vicky Belo, wala umanong pagsisisi ang sexy actress na si Katrina Halili kung bakit pa siya nagsampa ng kaso at sa halip ay sinabi nitong ginanahan pa siya sa kanyang laban makamit lamang ang katarungan

Aniya, alam niyang nasa tama siya kaya hindi siya nagsisisi. Mas mali aniya kung nanahimik siya sa ginawa ni Hayden Kho na pagkuha ng video sa ka-nilang pag-tatalik. Samantala, naiintindihan din umano ni Katrina kung piniling manahimik ng iba pang babae na umano'y naka-sama rin ni Hayden sa sex video. Aniya, hindi naman lahat ng babae ay kasing tapang umano niya. Nang tinanong kung iniiyakan pa rin niya ang kinahantungan ng kaso na ibinasura dahil sa kakulangan ng ebidensiya, inihayag ni Katrina na hindi na siya umi-iyak.
(Pinoy Patrol News Team)

6 PEKENG MADRE, ARESTADO SA AIRPORT

ANIM na kababaihan ang pinigil at idinetine sa Manila airport matapos mabistong nagpapanggap lamang bilang mga madre para makapuslit ng Lebanon. Sinabi ni Airport Immigration Officer Joel Valencia, nagpanggap ang anim bilang mga madre at bibiyaheng Hong Kong para dumalo umano sa religious seminar.

Ayon kay Valencia, naghinala lamang ang mga immigration officials nang mapansin ang kakaibang kasuotan at kilos ng anim na pekeng madre, na pansamantalang hindi ibinunyag ang mga pangalan habang iniimbestigahan kung sino ang kanilang recruiter.

Sa imbestigasyon, umamin ang anim na papunta sila sa Lebanon para magtrabaho bilang domestic helpers. Inaalam na ngayon ng mga awtoridad ang lalaking illegal na nagrecruit sa anim. Magugunitang simula noong 2007, ipinatutupad na ang deployment ban sa Lebanon dahil sa kaguluhan doon at kulang na legal protection para sa mga manggagawa sa nasabing bansa.

PAG-ASA, NAGBABALA... BAHA AT LANDSLIDE SA VISAYAS AT MINDANAO

PATULOY umanong makakaapekto ang tinatawag na wind convergence na magdadala ng maulap na kalangitan at kalat na kalat na malalakas na pagbuhos ng ulan at pagkidlat sa ilang bahagi ng Visayas at Mindanao na posibleng humantong sa pagbaha at mga landslides sa mga apektadong munisipalidad.

Ayon sa Philippine Atmospheric, Geophysical and Astronomical Service Administration (Pagasa), ang mga makakaranas ng wind convergence ay mga lalawigan na sakop ng Eastern Visayas region at Eastern Mindanao. Dahil dito, muling nagbabala ang Pagasa sa mga mangingisda mula sa Luzon, Visayas at Eastern Mindanao na huwag papalaot sa karagatan dahil sa inasahang malalakas na alon dala ng gale force ng northeasterly winds. (PP NEWS TEAM)

AFP GENERAL NI P-NOY, IPINAGTANGGOL ANG MGA AFP GENERALS NI GMA

IPINAGTANGGOL ni Brig. Gen. Jose Mabanta, tagapagsalita ng Armed Forces of the Philippines (AFP) sa panahon ngayon ng gobyerno ni Pangulong Benigno Aquino III ang tatlong naging dating AFP Chief of Staff nuong panahon ni dating Pangulong Gloria Macapagal-Arroyo, sa pagsasabing huwag muna silang husgahan.

Ito ay may kaugnayan sa naging expose ni dating Lt. Col. George Rabusa na pagtanggap umano ng milyong pisong pabaon ng mga nagreretirong AFP chief of staff, na sinasabing matagal na umanong kalakaran sa loob ng AFP. Ayon kay Gen. Mabanta, sa ngayon umano ang lahat ay pawang akusasyon pa lamang kaya't hindi marapat na husgahan ng taumbayan ang mga dating pinuno ng AFP. Sina dating AFP chief of staff at retired Generals Angelo Reyes, Roy Cimatu, at Diomedio Villanueva ang ilan lamang sa nakatakdang imbestigahan ng Department of National Defense (DND)-Special Task Force tungkol sa mga expose ni Rabusa.

Miss Public Service

 Kung may mga problema kayo na nais maiparating sa pamahalaan at sa mga pribadong sektor upang maaksyunan agad ng mga kinauukulan, puwede kayong lumiham sa aming tanggapan sa Unit 27, 8th Flr., Tower B, Victoria Towers, 78 Panay Avenue corner Timog Avenue, Quezon City/Mag-text sa 09493258103 o kaya ay mag-email sa misspublics@yahoo.com

***

MISS PUBLIC SERVICE, ako po ay isa sa mga kawani ng Facilities Manager Incorporated. Ang problema po namin dito ay iyong mga loan namin sa Social Security System (SSS) ay sa management ng aming kumpanya bumabagsak, ang problema, ang tagal bago nila i-release sa amin, at ang duda namin ay idinideposito pa nila ito sa kanilang account para tumubo. Tama po ba iyan ?--Mr. Capricorn HINDI tama iyan, kaya't tayo'y nananawagan kay SSS President Emilio de Quiros na paimbestigahan niya ang alingasngas na ito sa Facilities Manager Incorporated--MISS PUBLIC SERVICE

***

MISS PUBLIC SERVICE, sana po ay maiparating n'yo sa kinauukulan na masyadong bumagal na ang releasing ng mga pensyon namin sa Government Service Insurance Corporation (GSIS)--Retired public teacher GANUN po ba, sige at tatawagan agad natin nang pansin ang mga opisyal ng GSIS kung bakit bumagal ang kanilang pagse-serbisyo publiko --MISS PUBLIC SERVICE

***

MISS PUBLIC SERVICE, nabalitaan namin na bawal na ang lunch break sa mga tanggapan ng pamahalaan, kasama po ba dito ang mga tauhan ng barangay hall? BASTA nagtatrabaho sa lahat ng sangay ng pamahalaan ay ipinagbabawal ang lunch break. Puwede n'yo silang ireklamo sa tanggapan ni Chairman Francisco Duque ng Civil Service Commission (CSC).  --MISS PUBLIC SERVICE